काठमाडौं । प्रधानमन्त्री केपी शर्मा ओलीले बिहीबार प्रतिनिधिसभामा सांसदहरुले उठाएको प्रश्नको जवाफ दिएका छन् । जहाँ विपक्षी दलका सांसद्हरुले राष्ट्रिय राजनीतिदेखि भूराजनीतिक जटिलताका विषयमा खरो रुपमा प्रश्न राखेका थिए । अधिकांश प्रश्नको इन्कारी जवाफ फर्काएका उनले लिपुलेका र लिम्पीयाधुरा भ्रमणदेखि नेपाल भारत प्रवुद्ध समूह (इपीजी) प्रतिवेदनसम्मको विषयमा मुख खोले । प्रधानमन्त्रीसँग प्रश्नोत्तर कार्यक्रममा राप्रपा सांसद बुद्धिमान तामाङले ‘लिपुलेक, कालापानी र लिम्पियाधुरा भ्रमणमा कहिले जानुहुन्छ ? भ्रमणको कुनै कार्यक्रम बनेको छ कि छैन ? भनेर प्रश्न गरेका थिए । साथै उनले भारतका प्रधानमन्त्रीले नबुझेको अवस्थामा नेपालका प्रधानमन्त्रीले पनि इपीजी प्रतिवेदन बुझ्न नमिल्ने हो भन्ने जिज्ञासा राखेका थिए ।
जवाफमा प्रधानमन्त्री ओलीले इस्वी सम्बत १९६२ अघिसम्म नेपालले हालै प्रचलनमा ल्याएको चुच्चे नक्सा नै भएको बताएका छन् । लिपुलेक र लिम्पियाधुरा भ्रमण गर्ने योजना भने नरहेको उनले बताए । भविष्यमा भ्रमण हुन सक्ने दाबी गर्दै उनले प्रश्नकर्तालाई नै प्रश्न सोधे–माननीय ज्युको भ्रमणको योजना बनेको छ कि के हो ?
अर्को प्रश्नमा उनले इपीजी प्रतिवेदन भारतले पहिला बुझेपछि नेपालका प्रधानमन्त्रीले बुझ्ने स्पष्ट पारे । इपीजीलाई समझदारीपूर्वक समाधान गर्ने ओलीको दाबी थियो । त्यस्तै माओवादी केन्द्रकी सांसद् विमला सुवेदीले शान्ति प्रक्रियासँग सम्बन्धीत रहेर प्रधानमन्त्री ओलीलाई प्रश्न सोधिन् । सरकारले शान्ति प्रक्रियाका बाँकी कार्यभारलाई बेवास्ता गरेको उनको आरोप थियो ।
जवाफमा ओलीले शान्ति प्रक्रियाका बाँकी काम छिटोभन्दा छिटो टुङ्ग्याउन सरकार प्रयासरत रहे पनि प्रतिपक्षी दल नै सम्बेदनशिल नरहेको जवाफ फर्काए । यस विषयमा आफूले प्रमुख प्रतिपक्ष दलका नेतासँग छलफलका लागि पहल गरे पनि पछिल्लो समय प्रचण्ड अस्वस्थ भएकाले छलफल हुन नसकेको जिकिर गरे । हाल पार्टीको अभियानमा व्यस्त रहेका प्रचण्डलाई विरामी भएको भन्दै उनले व्यङ्य गरेका थिए ।
त्यस्तै एमाले सांसद् भगवती चौधरीले बैदेशिक रोजगारका कारण मुलुक युवाविहीन बन्दै गएकोप्रति प्रधानमन्त्रीको ध्यानाकर्षण गराईन् । उनले शैक्षिक संस्था नै रित्तिने अवस्था आएकोले बैदेशिक रोजगारी रोक्न सरकारसँग के कस्ता योजना छन् भन्दै प्रश्न गरेकी थिइन् ।
जवाफमा ओलीले देशका युवा बाहिरिए भन्ने कुरालाई पूरै नकारात्मक रूपमा बुझ्नु नहुने जिकिर गरे । व्यक्तिगत तवरमा विदेश जानुलाई गौरवको विषय ठान्ने र सामाजिक रूपमा भने त्यसलाई नकारात्मक भाष्यमा बुझ्ने दोहोरो चरित्रका कारण नकारात्मक सन्देश गएको उनको जवाफ थियो । हिजो जीवन निर्वाहका लागि सीमित विकल्प भए पनि आज विकल्प फराकिलो भएको र संसारको जुनसुकै कुनामा जान सक्ने छनोटको लाभ युवाहरूले पनि लिएको ओलीको भनाइ थियो । यद्यपि स्वदेशमा रोजगार श्रृजना गर्ने विषय सरकारको प्राथमिकतामा रहेको ओलीको दाबी थियो ।
ओलीले मातृशिशुको स्वास्थ्य अवस्था सुधार गर्न सरकारले संघ, प्रदेश र स्थानीय तहका अस्पताल एवम् स्वास्थ्य संस्थाहरूबाट विभिन्न कार्यक्रम सञ्चालन गर्दै आइरहेको जानकारी गराएका छन् । लुम्बिनी प्रदेशमा सुविधा सम्पन्न बर्थिङ हस्पिटल निर्माण गर्नका लागि नेपाल सरकार, थाइल्यान्ड अन्तर्राष्ट्रिय सहयोग नियोग र युएनएफपीए नेपालको सहकार्यमा सम्भाव्यता अध्ययन भइरहेको पनि प्रधानमन्त्रीको भनाइ छ ।
त्यसैगरी गौतम बुद्ध अन्तर्राष्ट्रिय विमानस्थलको दिगो सञ्चालनका लागि सरकारले सम्बद्ध निकायहरूसँग छलफल गरी कार्य योजना बनाएर कार्यान्वयन गर्ने पहल गरेको बताए ।
क्याटेगोरी : प्रमुख समाचार
थप समाचार
धेरै पढिएका
प्रतिक्रिया