प्रजातन्त्र दिवस भव्यताका साथ मनाइयो, चुनौतीहरुको सामना गर्दै मुलुकलाई समृद्धितर्फ लैजाने ओलीको प्रतिबद्धता
काठमाडौं । जहानियाँ राणाशासन अन्त्य भई प्रजातन्त्र आएको दिनको स्मरणमा बुधबार ७५औँ प्रजातन्त्र दिवस मनाइएको छ । विसं २००७ फागुन ७ गते १०४ वर्षसम्म चलेको जहानियाँ राणाशासन अन्त्य भई नेपालमा प्रजातन्त्रको स्थापनाको घोषणा भएकाले सोही दिनको स्मरणमा यो दिवस मनाउन थालिएको हो ।
प्रजातन्त्र दिवसका अवसरमा काठमाडौंको टुँडिखेलमा नेपाल सरकारको मूल समारोह समितिले बिशेष समारोहको आयोजना गरेको थियो । विशेष समारोहमा राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री केपी शर्मा ओली, प्रधानन्यायाधीश, प्रतिनिधिसभाका सभामुख देवराज घिमिरे लगाएतको सहभागिता रहेको थियो । सो अवसरमा राष्ट्रपति पौडेलको सम्मानमा नेपाली सेनाले सलामी अर्पण गरेको थियो । त्यस्तै नेपाली सेनाको हेलिकप्टरबाट राष्ट्रिय प्रजातन्त्र दिवस, २०८१ अङ्कित ब्यानर प्रदर्शन गरी पुष्पवृष्टि गरिनुका साथै शान्तिका प्रतीक परेवा उडाइएको थियो ।
त्यस्तै, नेपाली सेना, नेपाल प्रहरी, नेपाल स्काउट, सशस्त्र प्रहरी बलद्वारा ‘मार्चपास’ र ‘ब्याण्ड’ प्रस्तुत गरिएको थियो । काठमाडौ उपत्यकाका विभिन्न नगरपालिकाले सो अवसरमा बाजागाजासहित विविध सांस्कृतिक झाकी प्रस्तुत गरेका थिए ।
समारोहमा प्रधानमन्त्री केपी शर्मा ओलीले बिभिन्न चुनौतीहरुको सामना गर्दै मुलुकलाई समृद्धितर्फ लैजाने बताए । प्रधानमन्त्री ओलीले लोकतन्त्रको खुला मैदानमा नै जनताको जीवनमा प्रगति भएको भएपनि चूनौती अझै बाँकी रहेको जिकिर गरे ।
प्रधानमन्त्री ओलीले निर्दलीयताको समाप्ती, लोकतन्त्र, गणतन्त्र र संघीयता सहितको संविधान प्राप्तिमा प्रजातन्त्र दिवसको बिशेष महत्व रहेको धारणा राखे । उनले निरंकुश शासनले बनाएका संरचना र लोकतन्त्रले नागरिकको जीवनमा परिवर्तन ल्याउन बनाएका संरचनाको तुलना वस्तुगत र तथ्यगत हुन नसक्नेसमेत स्पष्ट पारे ।
क्याटेगोरी : देश
थप समाचार
धेरै पढिएका
प्रतिक्रिया