शान्ति प्रक्रियामा ओली, देउवा र प्रचण्ड एकसाथ : एउटै मञ्चमा एउटै बोली
काठमाडौं । लामो समयदेखि संक्रमणकालिन न्याय प्रक्रिया पूरा हुन सकेको छैन । न्याय दिलाउन सरकार र प्रमुख दलहरु सधैँ प्रतिबद्ध देखिन्छन् । तर काम भने प्रभावकारी हुँदैन । विहिबार पनि तीन प्रखुख दलका नेतृत्व एउटै मञ्चमा उभिएर संक्रमणकालिन न्याय टुङ्गोमा पुर्याएने प्रतिबद्धता जनाएका छन् । प्रधानमन्त्री केपी शर्मा ओलीले सङ्क्रमणकालीन न्यायसम्बन्धी दुई आयोगका कामलाई सफल बनाउन सरकारका तर्फबाट आवश्यक सबै सहजीकरण हुने प्रतिबद्धता व्यक्त गरेका छन । जवाफदेहीता निगरानी समिति र द्वन्द्धपीडित संगठनहरुद्वारा आयोजित सङ्क्रमणकालीन न्यायसम्बन्धी राष्ट्रिय सम्मेलनमा सम्बोधन गर्दै उनले सङ्क्रमणकालीन न्यायसम्बन्धी दुई आयोगका यसअघिका कामहरु किन सफल भएनन् भन्ने समीक्षा गरी आगामी दिनका कामलाई सफल बनाउन सबै लाग्नुपर्नेमा जोड दिए ।
कांग्रेस सभापति एवं पूर्व प्रधानमन्त्री शेरबहादुर देउवा, माओवादीअध्यक्ष एवं पूर्व प्रधानमन्त्री पुष्पकमल दाहाल सहभागी कार्यक्रममा प्रधानमन्त्री ओलीले पीडितलाई न्याय र परिपूरण दिन सरकार सक्रिय रहने विश्वास दिलाउँदै शान्ति प्रक्रियालाई निष्कर्षमा लैजन सङ्क्रमणकालीन न्यायसम्बन्धी कानुनलाई संसद्बाट सहमतिमा पारित गराइएको स्मरण गरे ।
नेपाली कांग्रेसका सभापति शेरबहादुर देउवाले वर्तमान सरकार शान्ति सम्झौताका बाँकी काम पूरा गर्न अघि बढिरहेको बताए । आयोगले शान्ति सम्झौताका मर्मअनुसार सशस्त्र द्वन्द्वका क्रममा भएका मानव अधिकार उल्लंघनका विषयमा सत्य अनुसन्धान गरेर न्याय दिलाउने विश्वास व्यक्त गरेका छन् ।
यस्तै, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफूले निकै ठूलो जोखिम उठाएर शान्ति प्रक्रियालाई टुङ्गोमा पु¥याउने प्रयत्न गरेको बताएका छन् । शान्ति प्रक्रियाका जटिल विषयलाई टुङ्गोमा पु¥याउन धेरै जोखिम उठाएको स्मरण गर्दै उनले शान्ति प्रक्रियालाई सफलतापूर्वक अघि बढाउन आफ्नो पार्टी विभाजनबाट गुज्रेपनि गुज्रोस् भनेर जोखिम उठाएको स्मरण गरे ।
संसद्बाट सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोगसम्बन्धी कानुन बनिसकेको छ । तर आयोगमा पदाधिकारी नियुक्ति हुन सकेको छैन । पदाधिकारी नियुक्तिका लागि सिफारिस समिति बनिसकेको छ । जसका कारण शान्ति प्रक्रिया तथा सङ्क्रमणकालीन न्याय प्रक्रिया छिटै पूरा हुने अपेक्षा गरिएको छ ।
क्याटेगोरी : प्रमुख समाचार
थप समाचार
धेरै पढिएका
प्रतिक्रिया