तीनकुनेमा प्रहरीले ६० राउण्ड गोली प्रहार भएको खुलासा, सुरेशको पोष्टमार्टमा गर्न चिकित्सकको इन्कार
काठमाडौ । सरकारले तीनकुने प्रदर्शन नियन्त्रण लिन प्रयोग भएको हातहतियारको विवरण पनि सार्वजनिक गरेको छ । आन्दोलनमा ६० राउन्ड गोली चलाइएको थियो । यसैमध्ये एक राउन्ड गोली लागेर कीर्तिपुरका २९ वर्षीय सविन महर्जनको मत्यु भएको थियो । उनको कोखबाट गोली लागेर ढाडबाट बाहिरिएको पाइएको छ । अर्का ज्यान गुमाएका पत्रकार सुरेश रजकको भने अझै पोष्टमार्टम हुन सकेको छैन । सुरेशलाई गोली लागेको हल्ला चलेको भन्दै चिकित्सकहरुले स्क्यानिङ गरेर मात्र पोष्टमार्टम गर्ने अडान लिएपछि यस प्रक्रियामा ढिलाई भएको हो । मृत शरिरको एक्सरे गर्ने मेसिन नहुँदा मंगलबार पोष्टमार्टमा पनि रोकिएको हो ।
प्रदर्शनमा ७४६ राउन्ड अश्रुग्यास, १९२ राउण्ड ब्ल्यांक फायर र २३९ पटक छर्रा प्रहार भएको थियो । प्रदर्शनमा ५५ जना प्रहरी, २२ जना सशस्त्र प्रहरी र ५२ जना प्रदर्शनकारी घाइते भएका थिए । उनीहरुमध्ये ३५ जना डिस्चार्ज भएका छन् भने १७ जनाको उपचार भइरहेको छ । प्रदर्शनमा अवाञ्छित गतिविधि गरेको आरोपमा अहिलेसम्म ६२ जनालाई पक्राउ गरेर विभिन्न मुद्दा चलाइएको छ ।
प्रदर्शनमा मानवीय र भौतिक क्षतिपछि राजावादीहरुको आलोचना भइरहेको छ । तथापी उनीहरुको चलखेल भने रोकिएको छैन । राष्ट्रिय प्रजातन्त्र पार्टी (राप्रपा) ले चैत २६ गते काठमाडौँमै प्रदर्शन र सभाको आयोजना गर्दै छ । सुरक्षा निगरानीमा रहेका राजसंस्था पुनस्र्थापनाका लागि जनआन्दोलन समितिका संयोजक नवराज सुवेदीले आफ्नो कार्यकारी अधिकार जगमान गुरुङलाई सुम्पिएका छन् । अन्य स साना समूहले पनि झुण्ड भुण्डमा भए पनि विरोध प्रदर्शन गरिरहेका छन् । यी सबै गतिविधि पूर्वराजा ज्ञानेन्द्र शाहकै रणनीति अनुसार भएको बुझाइका साथ सरकारले सुरक्षा रणनीति अघि सार्दै आएको छ । यसै क्रममा सरकारले राजावादीको अराजक प्रदर्शनमा सहभागी नहुन अपिल समेत गरेको छ । सरकारका प्रवक्ता समेत रहेका सूचना तथा प्रविधिमन्त्री पृथ्वीसुब्बा गुरुङले राजावादीको अराजक प्रदर्शनमा सहभागी नहुन आम सर्वसाधारणलाई मन्त्रिपरिषद् बैठकले अपिल गरेको जानकारी दिए ।
क्याटेगोरी : प्रमुख समाचार
थप समाचार
धेरै पढिएका
प्रतिक्रिया